هه‌سته‌کانی سه‌رۆک و هه‌ستی گه‌ل

قادر نادر

 

 له‌ کوردستانی باشوردا 16ساڵه‌ ده‌ستکه‌وتێکی سیاسی و ئیداری هاتۆته‌ ئاراوه‌ ، که‌ باجی به‌ده‌ستهێنانی ئه‌م ده‌ستکه‌وته‌‌ ‌گه‌ل داویه‌تی ، که‌ به‌ لافاوی خوێن ، نه‌ته‌وه‌یه‌ک له‌ ئێسک پروسک ، هه‌رێمیک له‌ کیمیاباران،   ده‌یان ساڵه‌ی ترس و ئه‌شکه‌نجه‌دانی  هاوڵاتیانی کورد له‌به‌رامبه‌ر فاشسترین ڕژێمی کۆتایی سه‌ده‌ی بیستا به‌ده‌ست هاتووه‌ ،  که‌چی تائێستادا  خۆشگوزه‌رانیه‌  مادی و ده‌سه‌ڵاته‌که‌ی ،  بۆ توێژێکی به‌رفراوانی به‌رپرسان و بنه‌ماله‌کانیانه‌ ، ‌ که‌به‌راده‌یه‌ک  دوای تێپه‌ڕینی  16 سال  به‌سه‌ر بارودۆخی سیاسی کوردستاندا  ، هێشتا سیاسه‌تی ئابلۆقه‌دانی خه‌لکی به‌ هه‌ڵوێست درێژه‌ی هه‌یه‌ ،  ئه‌مه‌ش له‌ده‌ره‌نجامدا بۆته‌ هۆی ئه‌وه‌ی که‌سێتی کورد زه‌لیل و تاراده‌یه‌ک تێک بشكێنرێت ،وه‌ ‌به‌رپرسانی پارتی ویه‌کێتی  به‌هه‌شتیێکیان بۆ خۆیان دروست کردوه‌، دۆزه‌خێکێش بۆ ره‌خنه‌ گره‌ جدیه‌کانیان    .  

 سیاسه‌تی ئابلۆقه‌دانی ئابوری  و چرکردنه‌وه‌ی ده‌سه‌لات  و  دامه‌زراندن و  پله‌ی سیاسی له‌فه‌رمانگاو دام و ده‌زگا سیاسیه‌کان له‌لایه‌ن پارتی و یه‌کیتی  له‌ 16 ساڵی رابردودا  ،   سیاسه‌تیکی تاسه‌ر ئێسقان دیکتاتۆری و خێله‌کیانه‌یه‌ ،  وه‌ک ئه‌وه‌ی کوردستان مۆلکی خۆیانه‌ و ئێمه‌ ش کۆیله‌ی هاوشێوه‌ی سپارتاکواسین  ؟؟؟  

ئه‌گه‌ر ره‌خنه‌یه‌کی جدیش له‌سه‌ریان بگریت ، ئه‌وا ده‌یان ناوو ناتۆره‌و زمانه‌کانی ترست به‌شێوازی جیاجیا  پێ نیشان ده‌ده‌ن ،  وه‌ک ئه‌وه‌ی ئه‌رکی ئێمه‌ تا سه‌ر جێبه‌جێکه‌رو  ئه‌وانیش بڕیارده‌ره‌ ،له‌هیچ کاتێکیشا بۆمان نیه‌ بڵێین ستۆپ سه‌رۆکه‌  به‌ڕێزه‌کان ئه‌وا ده‌رچونه‌ له‌خه‌تی سووری نه‌ته‌وه‌ییدا!!؟؟؟ . که‌ناوه‌ندی چاک به‌ هۆکاری ئه‌وه‌ی  له‌به‌رامبه‌ر تاوانبارانی ئه‌نفالا بوار ناده‌ن بڕیاری یاسا و دادگا جێبه‌جێ بکرێت  سکالانامه‌‌ی له‌سه‌ر سه‌رۆکایه‌تی  کۆماری عێراق( تاله‌بانی و هاشمی ) تۆمار کرد، یه‌کێتیه‌کان غه‌زه‌بیان لێهه‌لگرتوین وه‌ک ئه‌وه‌ی که‌عبه ئاسای موسلمانانمان ڕوخاندوه‌ ، له‌کاتێکدا ئه‌م شێوه‌ ململانێ وناره‌زایه‌تیانه‌  ، شیوازێکی زۆر مه‌ده‌نیانه‌ی سه‌رده‌مه‌ . ئه‌مه‌ جگه‌له‌وه‌ی  ئه‌گه‌ر ئێوه‌ وا  هه‌ست بکه‌ن ،  به‌س ئێوه‌ هه‌ستتان هه‌یه‌ به‌ هه‌ڵه‌ داچونه‌ ؟؟   ئێمه‌ش وه‌ک ئێوه‌ مرۆڤین ، گوێ و دل و هه‌ستی خۆمان هه‌یه‌ ، ناتوانین تاسه‌ر ئه‌و هه‌سته‌ په‌نگ خواردوه‌ ی خۆمان ‌ ،به‌هۆکاری ئه‌وه‌ی دوژمن سودی لێده‌بێنی بخۆینه‌وه‌ ؟؟؟؟   هه‌ر بۆیه‌ کاتێک جه‌لادانی باوک وبراکانمان داڵده‌ وله‌مه‌رگ ڕزگار ده‌که‌ن ، ‌ده‌سه‌ڵات و پله‌یان ده‌ده‌نێ، ئه‌وا  لوتکه‌ی تێك شکانی که‌رامه‌تی نه‌ته‌وه‌یی ئێمه‌یه‌  ، هه‌ر ئه‌مه‌شا وا ده‌کات له‌خاڵێکا ناره‌زایه‌تیه‌کانمان بته‌قێته‌وه‌ ، ئاخر له‌یادتان نه‌چیت ئێوه‌ وانه‌ی ئه‌وه‌تان فێر کردین که‌ ره‌وڕه‌وه‌ی  مێژوو به‌هیچ هێزێک ناوه‌ستێت .

هه‌قی خۆمانه‌ بپرسین له‌سه‌رۆکی (کوردستان ، حکومه‌ت وپه‌رله‌مان و سه‌رۆک پارته‌ سیاسیه‌ بریارده‌ره‌کانی کوردستان....  کوا له‌ 7 تڕێله‌ دۆلاری ئه‌م گه‌له‌ ،  خۆشگوزه‌رانی بۆ منالانی گۆپته‌په‌و قوربانیانی شیێخ وه‌سانان،  بریندارانی به‌رکه‌وتوی کیمیاوی هه‌ڵه‌بجه،  دایک وباوکێکی 10 منال ئه‌نفالکراوی بنه‌سڵاوه‌و داره‌تودا؟؟؟؟   ،ئه‌ی کاتی ئه‌وه‌ دانه‌هاتووه‌  بپرسین هۆی چیه‌ ئه‌هرامه‌کانتان له‌سه‌ری ره‌ش و قه‌ڵاچۆلانا شه‌ر له‌گه‌ل ئاسمان ده‌کات  ، که‌چی ئۆردوگاکانی شؤڕش و بنه‌سڵاوه‌و داره‌توو ده‌ڵێی سه‌ربه‌ پارێزگاکانی  ئه‌فریقیای هه‌ژارا  ؟؟؟؟  بڤه‌ی ئه‌و پرسیاره‌ له‌‌  بارزانی وتاله‌بانی له‌کوێدایه، ئه‌گه‌ر لێیتان بپرسین ،  که‌ی ئه‌و بوێریه‌تان ده‌ببێت بۆ یه‌ک جار  سه‌رێک له‌ دڵ و قودسی که‌رکوک و گوزه‌رانی ژیانی بنه‌ماله‌ی قوربانیانی گه‌رمیان و هه‌له‌بجه‌ دۆزه‌خ ئاسا بده‌ن  و بزانن دوای 16 ساڵ له‌ حوکمـرانی ئێوه‌ ،  پاشماوه‌ی گه‌وره‌ترین قوربانیانی  گه‌له‌که‌مان چۆن له‌ دۆزه‌خا ژیان ده‌گوزه‌رێنی ؟؟؟  مافی خۆمانه‌  ئه‌و پرسیارانه‌ بورژێنین که‌ داهاتی  ئه‌م گه‌له‌ ئه‌گه‌ر له‌ددانه‌کانی سه‌رۆک و نه‌خۆشیه‌کانی جێگری خه‌رج ده‌کرێت ،  ئه‌وا سه‌دان وهه‌زاران برینداری کیمیابارانی هه‌له‌بجه‌ و گۆپته‌په‌ و شیخ وه‌سانانیش ‌ وه‌ک ئێوه پێویستیان ‌ به‌ چاره‌سه‌رکردن هه‌یه‌ ؟؟؟؟ ئه‌گه‌ر ئیوه‌ نه‌خۆشیه‌کانتان له‌ قۆناخی خه‌باتا توش بووه‌ ،  ئه‌م خه‌لکه‌ش  له‌هه‌مان ڕێگاو کاروانا ، سیه‌کانی کامیل ئاسا له‌کارکه‌وتوه‌و ئه‌قلیمه‌کانیش چاویان کوێر بووه‌؟؟؟ ئایا  کاتی ئه‌وه‌ نه‌هاتووه‌ ئه‌و لاپه‌ره‌تان له‌گه‌ل باس بکه‌ین و بڵێین چۆن گه‌وره‌ترین داخوازی  کورد له‌گه‌ل ڕژێمه‌ یه‌ له‌دوای یه‌که‌کان کوردتان کرده‌ ‌قوربانی  دووماده‌ی دۆراوی سیاسی  140  و 58 ، ئاخر کاتی ئه‌وه‌ ‌هاتوه‌ پێتان بڵیین هه‌مووسه‌رۆکێک ئه‌گه‌ر سه‌رکه‌وتونه‌بوو مافی ئه‌وه‌ی هه‌یه‌ پێی بڵیین فه‌رموو شوێنه‌که‌ت چۆل بکه‌ بۆ که‌سیکی تر ؟؟؟؟  یان وا هه‌ست ده‌که‌ن ئێمه‌ تاسه‌ر ئه‌رکمان له‌سه‌رشانه ،‌ نه‌وه‌ک ماف  ، ئێوه‌ش بریارده‌رو ئێمه‌ش جێبه‌جێکه‌ر ، کاتی ئه‌وه‌ هاتووه‌ ئه‌و پرسیارانه‌ بورژێنرێت .